Foto: Ines Langhorst

Utblick: Wat passeert 2019 up Platt?

Eck will joa nu nich wäilig klingen: Oaber in nejen Joahr passert düchtich wat up Platt un in Nedderdütschen. In de Welt, in Deutschland un in Schaumburger Land – ok in Innernet. Doll! Klicket jück eis düa.

Wat ver een Theater

Eck weit nich, woville nedderdütsche Bühnen jenau dat gifft. Oaber eck weit, dat van Grotten Huus wie den Ohnsorg Theater bet nea lüttschen Laiengruppe wie de Plattdeutsche Heimatbühne Lauenhagen, jede Menge Lüe seck Theater up Platt ankejket.

„Wi maakt Theater“ bet 10. Januar 2019

Wenn je wat doaven wieten witt, kejket jück de Utstellunge „Wi maakt Theater“ an.
„Bet to’n 10. Januar is Schangs: Hen na den Bremer Marktplatz – rin in de Börgerschaft – rop na de 2. Etaasch. Hier kann jeedeen dat plattdüütsche Kulturleven bemöten“, schrifft dat Institut für niederdeutsche Sprache (INS) up sine Innernetseite. Wenn dat man nich ne Inloadunge is, weit eck ok nich.

Plattdeutsche Heimatbühne Lauenhagen speelt „Filou blifft Filou“

In Fewerwoar fänget denn de Sesong vanne Plattdeutsche Heimatbühne Lauenhagen an. An 2.2.2019 is Premiere van „Filou blifft Filou“. Bet Enne April speelt se fufftein Mol in Gasthaus Probst in Lauenhagen. Wenn je Koarten köpen witt, müet je anneraupen. Dat goaht Mändach bet Fridach af Klocke sesse: 05721/996437 . Hea künt je de Plattdeutsche Heimatbühne Lauenhagen up Facebook aboneejan. Denn verpasset je nix mier.

11. Jugendtheaterfestival in Varrel

De Niederdeutsche Bühne Varrel moaket 2019 dat ölmte Jugendtheaterfestival van Niederdeutschen Bühnenbund Niedesachsen und Bremen (NBB).  Termin hebbe eck noch nich efunnen – kuamt denn noch.

Karneval im Norden? Platte Prunksitzunge in Wölpinghausen

De Golanjecken ut Wölpinghausen witt 2019 n plattdeutsche Prunksitzunge moaken. Dat het se all up ürne Facebook-Seite verraten. An Sönndach, 24. Fewerwoar 2019 schall dat sau wejt sejn. Hea gifft dat n Artikel inne Schaumburger Nachrichten doatau. Eck weit goar nich, ob dat sauwat all egiebn het. Doa wüwwe doch eis upn Busch kloppen.

Plattart-Festival in März

„Wi sünd so free“ stoaht ävern Plattart-Festival 2019. Van 22. bet 31. März 2019 goaht dat ümme neje Kultur up Platt, veranstaltet vanne Oldenburgische Landschaft. Mie de Plattgold-Gala fänget dat Festival in Oldenburg an. Up www.plattart.de küant je kejken, doa gifft dat dat janze Projramm inne Äversicht. Nea de Facebook-Seite taun abboneejan klicket je hea lang.

Platt liern in Innernet: Neje Webinare

Platt liern, dat witt veele Lüe. Bether gaff dat nich veel, wat äver dat Innernet ging. Nu ist dat anners. Up de Site van Länderzentrum ver Nedderdütsch gifft dat Webinare. Her goaht dat nea de Äversicht.

20 Joare Europäische Charta der Regional- und Minderheitensprachen

20 Joare is dat nu her, dat de Europäische Charta vanne Regional- und Minderheitesprachen in Neddersassen gültig is. Nedderdütsch is n sülmstännige Spraake. Mie de Charta witt alle tehope up de Regional- und Minderheitensprachen passen un in Gang bringen. Doafer schall jeder, der mach, sein Spraake kürn. Un doatau ehürt ok, dat je jümmer doa, wo dat Plattkürers in Alltach gifft, ok up’n Amt nedderdütsch eküret werd un taun Beispeel ok Anträge up Platt estellt wern.

Kulturaarbaat moaket de Schaumburger Landschaft

In Schaumburger Land het dat noch nie nich einen emaaket. Wi het doafer mie Anja Gewald van Landkreis Schaumburg telefoneert. Se secht, dat düsse Aufgaben, de ut de Charta resulteert, tehope mie de Kulturaarbaat anne Schaumburger Landschaft utelagert is. Oaber wenn een up dat Amt kuamt, de Platt kürt, denn gifft dat vermutlich enauch Minschen bin Landkreis, de Plattdeutsch tauminnest verstoaht.

Aarbaatskrink Schaumburger Platt: 2019 wert sorteert

Bi de Schaumburger Landschaft gifft dat n Aarbaatskrink Schaumburger Platt. De sorteert se seck 2019 n bittchen. Lesstet Joar wür mie den Plattdeutschen Tach un de neje CD „Eck küer Platt! Du ok?“ n Menge tau maaken. De Lüe doa kümmert seck ehrenamtlich ümme Erhalt un Plege van Schaumburger Platt.

Plautdietsche Medienkonferenz in Detmold

Plattkürers ut Paraguay, Mexico, Kanada un Deutschland wit taun groten Dräpen in Detmold tehope kuamen: De Plautdietsche Medienkonferenz is van 2. bet 6. September 2019. De lesste is all veier Joahre her. Doa wür de Konferenz in Mexiko. Dat het Daniel Kaiser bi sin Besauk bi de Mennoniten in Paraguay ehüret. Wer Daniel Kaiser is un worümme hei ünnerwejens was, het hei üsch vertellt. Doatau kuamt denn ok bolle hea wat up’n Tachblog.

Bundestach gifft 125000 Euro ver n Utstellunge

Dat Niederdeutschsekretariat äverlecht mie de veier Minderheiten un Volksgruppen, de dat in Deutschland gifft, n Projekt. Alle tehope wit n Utstellunge maaken. De schall 2019 fertich wirn. 125 000 Euro het de Bundestach doafer in Haushalt innestellt. De Idee ver de Utstellunge is van de veier Minderheiten ekuamen. Doatau ehürn Dänen in Südschleswig, Friesen, Lausitzer Sorben un deutsche Sinti und Roma. De wit van ürne Geschichte, Kultur un Identität wat vertelln un het seck äverlecht, ouk de neddderdütschen Sprachgruppen vertaustellen. Eck finne dat joa spannend. Eck weit van de veer Minderheiten waanig. Doabie künt je tehope mie den Nedderdütschen de Veelfalt in usen Land seihn. Kejk we eis, wat doavan werd.

 

 

 

 

Kommentar verfassen