Raanemaaken: Wi feudelt düssen Dage n bittchen düarn Blog.

Raanemaaken up n Tachblog

Wi maaket kloar Schiff. Den Tachblog is nu all ein Joar online. Wi witt n bittchen sorteern un raanemaken.

Tüch, Krams un Gemöckes

Je kennt dat – denn fängeste eis an, kramst hea, feudelst doa. Tühste n Schapp vanne Wand un denn finnste doa nich blots Mölm. Doa licht dann ok noch dat lütsche Ding van den Deel, dat tau den Gemöckes ehüret, wo noch wat anne fehlt.

Twischendür: Kaffei!

Un denn kuamste van Höckschen nea Stöckschen – dotwischen heste goar kaane Lusten mier up düsset Jerumpel un Jemache. Drinkeste eis n Kaffei, ok tweie un äverlechst n bittchen un denn isset kloar: De Schapp, de kuamt an düsse Wand ok nich wia hen. Hei schall utewesselt wirn, süht nich mier sau gaut ut. N bittchen oll. Hei schall man beater nean Keller. Denn man tau. Trampeste de Stiege rünner.

De Schateken ut’n Kasten

Doa finneste denn ok wia n Kasten mie Tüch, wat wech schall. De Schapp passet doa sonst ok nich hen. Musste eben maaken, duat joa nich lange. Denkeste. Un denn sitteste doa in Keller uppe Treppe und primmelst de ollen Schateken utn Kasten – äver din Koppe funzelt dat lüttje Lucht un du schwelgest in olen Tieten.

De Bude süht ut…

Un de Bude süht ut, as wenn de Ire düchtich ebiewet het. De Schapp stoaht inne Mie vanne Kammer. De Feudel un dat Kehrblech mie den Mölm licht doatwischen. Nix is doa, wo et hen schall. Un‘ n Enne is nich in Sicht.

Hochkant in Schapp mie KonMarie

Da helpet vallichte Marie Kondo mie ürne fründliche Kramereje. Allet akkrat tehope lejjen, bedanken un denn hochkant ab in Schapp oder up dat Börd. Blaw, roue, witt: Nea Farben sorteet süht dat schmuck ut. Digital werd dat KonMarie-Prinzip oaber eng. Doarümme:

Raanemaken up’n Tachblog

Wenn je jück de nässten Wieken hea up’n Tachblog henklicket – denn wunnert jück nich. Wie teihn ok den Schapp vanne Wand, bringet doaver n poar mier Börds an. N poar van den Beiträgen kuamt in Keller. Janz wech kuamt hea up Blog oaber nix. Klicket jück düa.

Fehlt wat? Sejj üsch just, wat!

Wenn ja wat nich finnen künt, wat je oaber bruket, denn schrifft je ne E-Mail. Vallichte goaht bi düssen Geracke ok wat ävern Deister un wie krijet dat goar nich mie. Denn isstet doch glatt, wenn je just rinraupet. Dat goaht ok äver dat Kontaktformular.

Nix mier utlaaten: Dene Tachblog folgen

Un doamie je nix mier verpasset, wat hea sau passert, mellet jück an. Denn kricht je jümmers n E-Mail, wenn wi wat nejet emoaket het.

Plattdeutsche Leeders up’n Tachblog

Bet dat hea füdder goaht, hürt jück doch noch eis de plattdütschen Leeders up’n Blog an. Den Hamburger Jung. De lüttsche Burmeike van Dörpe Dat Bohnenpott-Leed . Un dat beste kuamt joa jümmer an Enne: Dat Du min Leevsten büst.

Raanemaaken: Aff un tau mot dat sejn.
Raanemaaken: Aff un tau mot dat sejn.

Kommentar verfassen