Foto: Ines Langhorst

TachProjekt up Besauk

Dat was n gladden Nämdach. Mie Plattkürers, Kaffei un Kauken un plattdeutsche Museek in Backhus. Doa dräpet seck de Lüe vanne Lindhöster Runne. Lesstens würn wi up Besauk.

De Lindhöster Runne in Schaumburger Land

De Lindhöster Runne, dat sin Kireles und Frunsminsche ut de Samtgemeinde Lindhorst in Schaumburger Lanne. De witt platt kürn und tehope sitten. Kuamen draf jeden , de Lusten up de Spraake het. Doabie is dat ejoale, ob een all wat kann oder nich. Hea wird eküret, vertellt un de Lüe helpet seck mie de Wurte. Jümmers gifft dat ok wat, woavan an den Nämdach erküret werd.  

Äver Plattdeutsch un Museek

Plattdeutsche Museek was dat Thema in August un doa het wir van TachProjekt n bittchen wat vertellt. Schwacke drüttich Lüe würn doa. De Deel van Backhus wür proppevoll. Christian un eck het veraff n bittchen wat äverlecht un denn gaff dat ne gladde Stunne vull mie Museek.

Düsse Leeders kennt je all

Dat gifft joa sau ne Handvull Leeders, de se alle kennt. Herrn Pastur sin Kau hürt doatau. Lüttsche Burmeike van Dörpe, de Hamburger Jung un de plattdeutsche Evergreen Dat Du min Leevsten büst. Van düsse Leeders hewwe hea upn Tachblog all wat upschriebn. Oaber jümmer wenn een van vertelln inne Kürereje kuamt, denn gifft dat wat Nejet. Wie singet ver üsch tweie Strophen. Veele Lüe het doatau de Strophe van Heidi Kabel in Koppe und die witt wi nu ok vallichte noch doatau nehmen.

Moderne plattdeutsche Musik

Oaber et gifft ok moderne plattdeutsche Museek un de Szene het von HipHop äver Metall bet nean Party-Schlager allet up Platt tau bieten. De plattdeutsche Museek wird ok äver besonnere Formate ünnerstützet. Dat finnen wi joa gaut.

Plattsounds: Füdder sejjen!

De plattdeutsche Wettbewerb Plattsounds is sau wat: Doa küant ok Bands un Kapellen mie Lüe bet drüttich Joahre miemaaken, de goar keen platt kürn. Kennt je wen? Denn sejjt dat eis füdder. Ver düsset Joar müet je bet 22. September 2019 de Leeders henschicken. Gifft ok n bittchen wat ver de Bandkasse tau gewinnen un de Siegers goaht nean Semifinale van Local Hero Bandcontest. Mier doavan finnet je up de Innernetsejte van Plattsounds.

Tehope maaken

Dene Zietel mie alle Infos hewwe ok bi de Lindhöster Runne füdder egieben. Vallichte gifft dat n Enkel oder junge Lüe in de Noaboaschapp, bie de Kerken oder bin Fautballverein, de Museek maaket. In besten Falle dauet seck de olen Lüe mie de jungen tehope un helpet bin Äversetten un de Utspraake.

Goaht eis hen nea de Lindhöster Runne

De Lindhöster Runne dräpet seck jümmer an ersten Dingestach in Monat. Klocke Veier is de Kaffei trechte. Halwich Sesse is Schluss. Christoph Meier ut Kobbensen kümmert seck ümme dene Inhalt, de Trachtengruppe kocht Kaffei un maaket allet glatt. Hea is de Link taun Backhus bi Eichhöfe in Lindhorst. Doa finnet je ok dde Adresse un ne Koachten.

Utnoahme in September

Un as dat bi Regeln sau is, gifft dat in September n Utnoahme: De Lindhöster Runne dräpet seck an Dingestach, 3. September 2019, Klocke Sesse bi Christoph Meier upn Hoff in Kobbensen taun grillen. Mier doavan weset jück dat Blatt in de Region. Dat Dräpen is free ver alle, de Lusten het. Bringet wat vert Buffett mie. Nudelsalat is all doa, het wi ehüret.

Bet nässtet Joar.

De nässte Termin in Backhus is denn an Dingestach, 1. Oktober 2019, Klocke Veier. Wi kuamt vallichte nesstet Joar wia up Besauk. Dat wür n gladden Näamdach. Bedankt!

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.